Adriano mund të kalojë te Fiorentina

Adriano mund të kalojë te Fiorentina
Sulmuesi "i dëbuar" i Interit, Adriano, ka thënë se këtë verë mund të bëjë një transferim te Fiorentina.

Vitin e kaluar Adriano është dërguar në Brazil për t’u rehabilituar pas problemeve të shumta personale, siç janë depresioni dhe alkoolizmi, ndërsa atje i është bashkangjitur skuadrës së Sao Paulos në formë huazimi, ku ka lënë një përshtypje të mirë duke shënuar 11 gola në 17 ndeshje.

“Perandori” pritet të kthehet tek Interi në fund të sezonit evropian, mirëpo ekzistojnë dyshime të mëdha nëse zikaltërit do ta mbajnë atë.

Njëra nga skuadrat e cila dëshiron ta transferojë brazilianin, është skuadra pretendente për Ligën e Kampionëve, Fiorentina, me të cilën Adriano ka luajtur në vitin 2002 në formë huazimi.

“Prandelli më kupton dhe din të ma lexojë mendjen. Ai ka folur me mua shumë shpesh. Sa herë që shihte se kam probleme më ftonte për drekë”, ka lavdëruar 26-vjeçari, ish-trajnerin e tij te Parma.