Collina: Finalja e vitit ’99 e paharrueshme

Collina: Finalja e vitit ’99 e paharrueshme
Ish-arbitri i njohur i futbollit, Pierluigi Collina, ka zbuluar se finalja e vitit 1999 mes Manchester United dhe Bayern Munichut, mbetet një prej kujtimeve që më të veçanta në karrierën e tij.

Collina, padyshim referi më i njohur në botë, ka ndarë drejtësinë në ndeshjet më të rëndësishme të futbollit, përfshirë edhe Kupën Botërore të vitit 2002, kur Brazili mposhti Gjermaninë në finale, falë dy golave të Ronaldos.

Por, kur është pyetur të tregojë momentet më interesante në karrierë, italiani kujton ndeshjen finale të Ligës së Kampionëve të vitit 1999, atë mes Manchester United dhe Bayern Munich në Camp Nou, si një prej më interesanteve.

“Mund të them se kam qenë mjaft, mjaft me fat pasi që ka pasur shumë ndeshje të shkëlqyeshme që i kam referuar. Nuk mund ta shmang theksimin e finales së Kupës Botërore, por veçanërisht e mbaj mend edhe finalen mes Manchester United dhe Bayern Munich”, thotë arbitri italian

“Do ta mbaj mend gjithmonë, për arsye të ndryshme. Mbi të gjitha, ka qenë reagimi i tifozëve të Manchesterit kur ata shënuan golin e dytë, ishte një zhurmë e pabesueshme, si një ulërimë luani”, ka shtuar Collina.