Manchester United një fitore larg titullit

Manchester United ka bërë edhe një hap drejt titullit të Premierligës, pasi që mposhti ekipin e West Ham United në Old Trafford me rezultat 4-1, megjithëse më shumë se gjysmën e ndeshjes luajti me 10 lojtarë.

Cristiano Ronaldo shënoi dy herë, ndërsa Carlos Tevez dhe Michael Carrick që të dy shënuan nga një gol kundër ish-klubit të tyre, derisa United tash kryeson me 84 pikë, me vetëm edhe një ndeshje të mbetur.

Ronaldo, i cili dje u emërua Futbollisti i Vitit në Angli, për të dytin sezon, i solli avantazhin e hershëm Unitedit (3’), ndërsa dyfishoi atë pas 24 minutash, për të çuar në 40 numrin e golave të tij këtë sezon në të gjitha garat. Dy minuta më vonë (26’), ish sulmuesi i West Hamit, Carlos Tevez, shënoi golin e tretë me anë të një goditjeje nga distanca, dy minuta para se Dean Ashton të përgjigjet për të ngushtuar rezultatin në 3-1 (28’).

United mbetën me 10 lojtarë kur Nani u përjashtua tetë minuta para fundit të pjesës së parë. Carrick vulosi ndeshjen me një gol të pjesës së dytë, të shënuar pasi që goditja e tij u devijua nga Neill (59’).

Chelsea, që të hënën do të udhëtojë tek Newcastle United, tash grumbullon 81 pikë. Nëse klubi nga Londra humb të hënën, titulli do të jetë i djajve të kuq, edhe nëse këta humben në ndeshjen e fundit ndaj Wiganit dhe blutë fitojnë ndaj Boltonit. Por nëse Chelsea fiton apo së paku barazon në ndeshjen e të hënës, gjithçka do të mbetet për javën e fundit të ndeshjeve të Premierligës.