Barcelona do t’i shesë dhjetë lojtarë

Barcelona do t’i shesë dhjetë lojtarë
Barcelona do të fillojë projektin e "rindërtimit" duke lejuar dhjetë futbollistë të ekipit të parë të largohen në verë, ndërsa listës i prijnë Ronaldinho dhe Thierry Henry.

Pas eliminimit nga Liga e Kampionëve në mesjavë nga Manchester United, Blaugranëve s’u ka mbetur asgjë për të luftuar pos vendit të dytë, ndërsa ky është sezoni i dytë të cilin do ta përfundojnë pa trofe.

Ky dështim e ka shtyrë klubin të bëjë një plan radikal për në afatin veror të transferimeve, i cili udhëhiqet nga sekretari teknik Txiki Begiristain.

Sportivja, “AS”, ka bërë listën e vetë të lojtarëve të cilët supozohet se do të largohen gjatë fushatës në verë, ndërsa sipas tyre edhe Freank Rijkaard do të largohet nga posti i trajnerit.

Listës i prin Ronaldinho, i cili pritet të bëjë një transferim ose në Itali ose në Angli, ndërsa skuadrat e interesuar për të janë klubet milaneze, Milan dhe Inter, derisa së fundmi interesim të madh për brazilianin ka shfaqur edhe Manchester City.

Henry është i dyti në listë pas një sezoni zhgënjyes me katalunasit. Deco është një tjetër lojtar i cili mund t’u bashkëngjitet atyre që do të largohen, pavarësisht dëshirë së tij për të qëndruar.

Sipas “AS”, Lilian Thuramit tanimë i është thënë të kërkojë një klub tjetër prej 30 qershorit, ndërsa largimi i Edmilsonit duket punë e kryer pas spekulimeve se ai ka nënshkruar një parakontratë me Villarealin.

Në listë janë përfshirë edhe emrat e Rafa Marquez, Eidur Gudjohnsen, Gianluca Zambrotta, Santi Ezquerro, ndërsa listën e mbyll braziliani, Sylvinho.